உள்ளடக்கத்திற்கு செல்லவும்
கலைஞர்கலைஞர்
கவிதைகள்

இதயத்தைத் தந்திடு அண்ணா

பகுதி 2 · 2 / 13

அன்பெனும் வேது கொண்டாற்றியும்

செங்கனி வாய் மருந்தாட்டுவார்

சீர்மையைப் பாடக் கேண்மினோ!

பொருதடக்கை வாளெங்கே; மணி மார்பெங்கே?

போர் முகத்தில் எவர் வரினும் புறங்கொடாத

புரவலர்த் தோளெங்கே எங்கே யென்று

தம்பியரைக் கேட்டதனைக் கேண்மின்! கேண்மின்!

காஞ்சியிருக்கக் கலிங்கம் குலைந்த

கலவி மடவீர் கழற்சென்னி

காஞ்சியிருக்கக் கலிங்கம் தொலைந்த

களப் போர் பாடத் திறமினோ என்று

மயல் கொண்ட மாதர்தமைத் துயில் எழுப்பச்

செயல் கொண்டார் பாடினார்,

களப்பரணி.. கலிங்கத்துப் பரணி

அளப்பரிய வீரத்தின் புகழ்ப்பரணி - யான்

கவிப்பரணியேற்றி, காஞ்சிபுரப் பரணி

பாடி நின்றேன் இன்று

அவலப் பரணி பாடுகின்றேன்....!

கவியினில் பொருளெனக் கரும்பினில் சுவையெனக்

கதிரினில் ஒளியெனக் காவினில் மலரென

நிலவினில் குளிரென நிலமிசை வளமெனக்

குலவிடும் அருவி குழறிடும் மொழியென

உலவிடும் காற்றில் ஏறிடும் இசையென

அலையெழுங் கடலின் ஆடிடும் நுரையெனக்

கலைமணங் கமழக் கூடிய கவிஞர்

தலைமகன் அண்ணா திருப்புகழ் பாடிட