உள்ளடக்கத்திற்கு செல்லவும்
கலைஞர்கலைஞர்
கவிதைகள்

அணையா விளக்கு அண்ணா

பகுதி 5 · 5 / 13

அறிஞர் பெருந்தகை சுந்தரனாரும்,

ஆசிய ஜோதி நேரு பிரானும்

அழுத்தமாய் வைத்த ஆதாரங்களைப்

பொருத்தமாய் எடுத்துரைத்துக்

கருத்துரை வழங்கிய காஞ்சித் தலைவனே;

அன்று முதல் தானே நீ என்றும்

அணையா விளக்கானாய் திராவிடப் பண்பாட்டைச்

சூழ்ந்த இருள் விலக்க -

அய்யா பெரியாரின் அறப்போருக்கு வாளாக வாய்த்தவனே;

அய்யன் குறள் போல அண்ணா உன் உருவம் -

கம்ப ரசமும், ரோமாபுரி ராணியும் காட்டும் உன் பருவம் - எனினும்;

ஆரியமாயை கண்டால் அடித்து விரட்ட உயரும் உன் புருவம்!

இதிகாச புராணமாய் இறைவன் அவதாரக் கதைகளாய்

இலக்கியம் ஒரு காலத்தில் இருந்தது தமிழருக்கு

இருப்பினும் நீ வந்த பின்தான்

இயக்கினோம் அதனை; வீர காவியமாய் - காதல் ஓவியமாய் -

இப்புவி அறிந்திட; ஆய்ந்து தெளிந்திட! அறிவு மணம் கமழ்ந்திட!

அய்யா தந்த துணிவும், அண்ணா நீ தந்த தெளிவுமன்றோ

சங்கத் தமிழுக்கு விளக்கமளிக்கவும் -

தங்கக் குறளுக்குத் தக்கதோர் உரை எழுதவும்

ஒல்காப் புகழ் பெற்ற

தொல்காப்பியத்தை ஊர் மன்றில் உயர்த்திக் காட்டவும்

துணிவை எனக்குத் தந்ததென்பேன் -

சிலப்பதிகாரச் செல்வி கண்ணகியின் புகழ் மிக்கப் “பூம்புகார்”க்

காவியம் படைத்திடவும் - கடற்கரையில் சிலை அமைத்திடவும் -

வைத்த சிலையை வாஸ்து சாத்திரக்காரர் வலுவில் அகற்றியபோது

பைத்தியக்காரச் செயல் என்று அவர்களை கண்டித்திடவும்