அணையா விளக்கு அண்ணா
பகுதி 3 · 3 / 13
“கூடங்குளம்” வந்து விட்டால் கூடி விடும் மின் உற்பத்தி - பின்
கவலையில்லை மக்களுக்கென்று - பிரதமரும், சோனியாவும்
உறுதியாகச் சொன்ன பிறகும்; அந்த உண்மையினை ஏற்காமல்
ஊர் கூட்டித் தமிழ்நாடு இருளாகிவிடுமென்று தம்பட்டம் அடிக்கின்றார் -
நாளைக்கு வெளிச்சம் வந்தால், நம்மோடு சேர்ந்து “தன்னால்” தான்
வந்ததென்பார் -
நமக்கேன் அவர்களுடன் வம்பு; அந்த அணையும் விளக்குகளை விடுத்து
“அணையா விளக்காம்” அண்ணா
அழைக்கின்றார்; அங்கு செல்வோம்!
வாரீர்!
அண்ணனே!
எங்கள் உயிரே!
உணர்வே!
இனமானக் கோவே!
எழுச்சியின் வடிவே!
எண்ணங்கள் மலரும்
எழிலார் சோலையே!
எஃகுக் கம்பிகளாம்
இனிய தம்பிகளின் இதயத் துடிப்பே!
(முதல் நூற்றாண்டு தொடக்கம் உனக்கு - ஆனால்
அறுபதுக்கு முன்பே முடிந்ததே ஆயுள் கணக்கு?
அழகு தமிழ்ப் பேச்சில்
அருவிகளை வென்றவன் நீ!
ஆங்கிலச் சொல்மழையோ - உன்
ஆற்றலுக்கு ஆலவட்டம்!
எழுத்துக் கற்கண்டுகளை மலையெனக் குவித்தாய்!
எறும்பென மாறி நாங்கள் அவற்றைச் சுவைத்தோம்!
