சிந்தனையும் செயலும்
கட்டுரைகள் 18 · 18 / 50
பாம்பைப் பிடித்துக் கொள்ள, அது பதுங்கியிருக்கும் நந்தவனத்துப் புற்றுகள் நாலைந்தில்; குறிப்பாக எதுவெனத் தெரியாமல் எல்லாப் புற்றுக்களையும் அழித்திட நந்தவனத்தையே மொத்தமாக நாசமாக்குதல் போல; நடத்தப்படும் தீய திருவிளையாடல்தான் தீவிரவாதத் தாக்குதல் - எதிர்காலத்தில் எத்தனையோ ஆண்டுகளுக்குப் பிறகு தீவிரவாதமானாலும், பயங்கரவாதமானாலும் அறவே ஒழிக்கப்பட்டுவிடக்கூடும்.
அப்போது இதை எழுதியோனும், திக்கெட்டும் தீவிரவாதச் செயல்பற்றிய செய்திகள் கேட்டு இன்று திகைத்துக் கிடப்போரும் அந்த அமைதியான நல்ல நாட்களில் வாழ்வோமோ இல்லையோ; நலனும் அமைதியும் வாய்த்திடவும் மக்கள் நிம்மதிப் பெருமூச்சு விடவுமான அந்த நாட்களுக்கு அடித்தளம் அமைக்கும் பணிக்கு இந்தக் கற்களும் பயன்பட்டும் என்பதே என் பேரவா!
மூல காரணம் என்ன; தீவிரவாதத்திற்கு ?
முக்கியமாக மதப் பூசல்களேதான்!
எல்லைப் பிரச்சினைகளேதான் !
அந்தப் பூசலே ரயிலைக் கொளுத்துகிறது; ஏன்; ஊரையே கொளுத்தி மகிழ்கிறது! உயர்ந்த மணிமாடங்கள் தீவிரவாதிகளின் தீப்பந்தங்களில் சாம்பலாகிச் சுருள்கின்றன; சுக்கு நூறாகின்றன!
குடும்பம், குடும்பமாகத் தீவிரவாதிகளின் தாக்குதலால் மரணக் குழிக்குப் போகிறார்களே! குழந்தைகள் என்ன; இஸ்லாமியர் வீட்டுப் பிள்ளை ஓர் இந்துவை இழித்துரைத்ததா? ஓர் இந்து வீட்டுக் குழந்தைதான் இஸ்லாமியர் வீட்டு மழலையைக் கேவலப்படுத்தியதா? பின் எதற்காக ? தீவிரவாதிகள் நடத்தும் தாக்குதலில் பாவம்; அந்தக் குழந்தைகளை; பச்சைக் கிளிகளின் கழுத்தை முறித்துப் போடுவது போல் போட்டுவிடுகிறார்கள் ?
பாவமோரிடம் பழியோரிடம் என்பதற்கு இந்தப் பயங்கரவாதிகள் நடத்தும் வெடிகுண்டுச் சம்பவங்கள், பிரதான எடுத்துக்காட்டுகள் அல்லவா ?
நாடி தளர்ந்து நரம்புகள் தேய்ந்து தசையும் தோலும் வற்றியும் சுருங்கியும் முனகிக் கொண்டு கிடக்கும் முதியோர் என்ன; முரட்டு ஆயுதங்கள் தூக்கி வந்தனரா; பயங்கரவாதிகள் பயந்து நடுங்க ?
பிறகேன்; தீவிரவாதம் என்ற பெயரால் சகட்டு மேனிக்கு சகலமானவர்களும்; தீவிரவாதிகளின் பயங்கர சதிச் செயல்களுக்குப் பலியாக வேண்டும் ?
இதனால் மதப்பூசலைத் தீர்த்து விட முடியுமா ? குண்டுகளுக்குப் பதிலாக இரு சாராரும் பூச்செண்டுகளை கைமாற்றி வழங்கிக் கொண்டு; வாய்மையுடன் வாதிட்டு; இந்து என்ன; இஸ்லாமியர் என்ன; கிறித்துவமென்ன; பெளத்தமென்ன; சமணமென்ன ? எம்மதமும் சம்மதமே என்ற நிலை பிறக்கவும் - எல்லைத் தகராறுகள்; உன் நாடு, என் நாடு என்ற உரிமைப் போரில் உடன்பாடு கண்டிடவும் - ஓர் அரிய நிலை உருவாகும் வரையில் அதற்கான ஆயத்தங்களைத் தீவிரவாதத்தினால்தான் செய்திட வேண்டும் என நம்புவதும் அதற்கேற்ப நடைமுறை வகுப்பதும்; நுனிக் கிளையில் அமர்ந்து அடிக் கிளையை வெட்டுவதற்குத்தானே சமமாக முடியும்.
எந்தக் குறிக்கோளை அடையவும் - அது குவிந்து கிடக்கும் பொருள் வளமாயினும், நிலவளமாயினும், அதிகாரமாயினும், மதச்சார்பின்மையாயினும் ஒவ்வொன்றையும் அல்லது அனைத்தையுமே அதிரடித் தீவிரச் செயல்களால்தான் வென்றெடுக்க முடியும் என்ற வேண்டாத நினைப்பை விட்டொழிப்பதுதான் மனித சமுதாயத்திற்கு; சற்றுத் தாமதமாயினும் - நன்மை பயக்கக் கூடிய சாத்வீக மார்க்க நன்னெறியாகும்.
“இல்லை; இல்லை! மூட்டைப் பூச்சியை விரட்ட, வீட்டைத்தான் கொளுத்துவேன்” என்பது விதண்டாவாதமாகும். அதன்படிச் செயல்படுவதும்; விபரீதச் செயல் மட்டுமல்ல; விபரம் புரியாதோர் நடத்தும் வேதனைச் செயலுமாகும்! எனவே தீவிரவாதத் தீப்பந்தத்தைக் கீழே போட்டுவிட்டு; மூட்டைப் பூச்சியை விரட்டி வீட்டைக் காத்திட; தக்க மருந்து அடிப்போம்; தவறாமல் அகந்தூய்மை, புறந்தூய்மையைக் கடைப்பிடிப்போம்! தேனில் குழைத்துக் கொடுத்தாலும் ‘தீவிரவாதம்’ என்பது மருந்தாகி விடாது.
தீராத விஷமேயாகும்.
5 - 8 - 2005
★★★
சிலரால் சில பழக்கங்களை நிறுத்த முடியாது. புத்தகம் படிக்கும்போது, அதன் பக்கத்தைப் புரட்டி அடுத்த பக்கம் படிப்பதற்கு புத்தகத்தின் தாளை வெறுமனே புரட்டாமல் விரலை நாவிலோ அல்லது உதட்டிலோ தோய்த்து அந்த உமிழ்நீர் ஈரத்தின் உதவி கொண்டேதான் தாளில் விரலைத் தோய்த்து பக்கத்தைப் புரட்டுவார்கள்.
வாசிப்பதற்காக அந்தப் புத்தகத்தை எடுப்பதற்கு முன்பு அது நூல் நிலையத்திலோ அல்லது வீட்டு அலமாரியிலோ தூசிப் படலத்தின் நடுவே இருந்திருக்கக் கூடும்.
எனவே தூசி படிந்திருப்பது; கண்ணுக்குப் புலப்படாமலேயிருக்கிற அந்தப் பக்கத்தில் படுகிற ஈரமான விரலில் அந்தத் தூசி பற்றிக் கொள்ள வாய்ப்பு இருக்கிறது.
அப்படிப் பற்றிக் கொண்ட தூசு; மீண்டும் அந்த விரல், அடுத்த பக்கத்தைப் புரட்டும்போது, அந்தத் தாளில் ஒட்டிக் கொள்ளக் கூடும். அப்படி ஒட்டும் பகுதி, தொற்று நோய்க் கிருமி சுலபமாக ஏறிச் சவாரி செய்கின்ற அளவுக்கு வாகன வசதிகளை வழங்கக் கூடியதாக ஆகிவிடவும் கூடும். கண்ணுக்குத் தெரியாமல் கருத்துக்குப் புலப்படாமல் ஏதோ ஒன்று அரிப்பாகத் தினவெடுத்து; மெல்ல மெல்லத் தொல்லை கொடுத்து, மருத்துவர்கள் பின்னர் அந்த நோய்க்குப் பெயரும் சூட்டுவார்கள்.
தாளைப் புரட்ட விரலில் தண்ணீரைத் தொட்டுக் கொள்ள அலுப்பு - விரைந்து விரலால் நாக்கில் உமிழ்நீரைத் தொட்டுக்
கொள்ள சுலபமாக முடிகிறது. ஆனால் அது தீமையில் முடிந்தால் திண்டாட வேண்டியிருக்கிறது.
வேறு சிலரோ விரலையோ அல்லது விரல்களையோ அக்குளில் வைத்து அழுக்கைத் திரட்டுவார்கள். அப்படிச் செய்வது; ஆழ்ந்த தூக்கத்தில் செய்வது போல மெய்மறந்த நிலையில் இருக்கும். அக்குளில் திரட்டப்பட்ட அழுக்கை இரு விரல்களால் உருட்டுவார்கள். அப்போதும் மெய்மறந்த இன்பத் தோற்றம்தான்! உருட்டப்பட்ட அந்த அழுக்கை மூக்கின் முன்னே கொண்டு போய் அதன் வாசனையை நுகர்வார்கள். பிறகு அந்த அழுக்கு உருண்டையை எப்போது கீழே போடுவதென்பது அவர்களது விருப்பத்தைப் பொறுத்தது.
நினைவிருக்கட்டும், அதே அழுக்குத் தோய்ந்த விரல்களைக் கொண்டுதான் நாவையும் தடவி அந்த எச்சிலைப் பயன்படுத்தி, புத்தகத்தில் லேசாக ஒட்டிக் கொண்டிருக்கிற பக்கங்களைப் பிரித்துப் படிப்பார்கள் என்கிறபோது; வியாதிக் கிருமிகளை விருந்துக்கு அழைத்தது போன்ற விபரீதம் ஏற்படுவது இயற்கைதானே!
புத்தகத் தாள்களை, உமிழ் நீரில் விரல்களை நனைத்துப் புரட்டுவதை விடத் தீமை பயப்பது என்னவெனில் - சில நேரங்களில் விழா ஒன்றுக்கான அழைப்புகளோ அல்லது மணவிழா மடல்களோ - அல்லது வார நாளிதழ்களோ அஞ்சல் வாயிலாக அனுப்பி வைக்கப்படுவதற்கு அத்தனை தபால் தலைகளையும் - அதன் பின்புறத்தில் உள்ள பசையை நொடியளவே நாவினால் நக்கி நனைத்து ஈரமாக்கி அவற்றை அவற்றுக்கான உறைகளில் அப்படியே பதிய வைப்பதுதான். அதைவிட நச்சுத் தன்மை வாய்ந்த ‘தொற்று’ வேறு என்ன இருக்க முடியும்!
நூற்றுக்கணக்கான அஞ்சல் தலைகளின் பசை தோய்ந்த மறு பக்கத்தை நாக்கினால் தடவி ஈரமாக்கிக் கொள்வதால் எத்தகைய நச்சு நோயும் தொற்றிக் கொள்ளும் நிலை தாராளமாக ஏற்படும். தபால் தலைகளின் பின்புறப் பசையை மட்டும் அல்லாமல்; தபால் உறைகளின் ஒட்டுகிற பகுதியைச் சிலர்
மிகுந்த ஆர்வத்துடன் நாவினால் ஈரமாக்குவதைக் கவனித்தால் ‘மோர்சிங்’ வாத்தியம் வாசிப்பது போலக் கூட இருக்கும்.
இவ்வளவுக்கும் காரணம் என்ன ? தூய்மையாக இருக்க வேண்டும் என்ற அக்கறை இருந்தாலும்கூட; அஞ்சல் தலையில் ஈரம் சேர்க்கத் தண்ணீர் கொண்டு வர வேண்டுமே - அதற்கு ஒரு குவளை வேண்டுமே - அதற்காகத் தண்ணீர் இருக்குமிடம் செல்ல வேண்டுமே - இந்த நினைவினால் ஏற்படும் சோம்பல்தான் முக்கியமான காரணம் -
