உள்ளடக்கத்திற்கு செல்லவும்
கலைஞர்கலைஞர்
பெருமூச்சு/கட்டுரைகள் 7
கட்டுரைகள்

பெருமூச்சு

கட்டுரைகள் 7 · 7 / 13

ஆகவே, திராவிடத் தனியரசிலே உங்களுக்கு நம்பிக்கை யிருப்பது உண்மையானால் இரண்டு லட்சத்திற்கு மேற்பட்ட நீங்கள் அண்ணாவின் தலைமையிலே மாநில மாநாட்டிலே திராவிட நாடு பெற்றே தீருவோம் என்று எடுத்துக்கொண்ட பிரதிக்ஞை உண்மையானால்—ஜனநாயகத்தில் உங்களுக்கு இருக்கும் நம்பிக்கை உண்மையானால் ஏழைகளின் தோழன், பாட்டாளியின் நண்பன், திராவிடத் தீரன் தோழர் பி. பாலசுப்பிரமணியத்திற்கு உங்கள் வாக்குகளைக் கொடுத்து வெற்றி பெறச் செய்யுங்கள் அவரின் வெற்றி உங்கள் வெற்றி திராவிடத்தின் வெற்றி.

திராவிடத் தனியரசு பெறுவதற்கான நம் போராட்டத்திலே குறுக்கே வந்து கொடி நாட்டப் பார்க்கிறார் கோயங்கா! வட நாட்டுச் சீமான், வட்டிக்கடை வைத்து வண்டமிழ் நாட்டை வறண்ட நாடாக்கிய வஞ்சகர்களின் பிரதி நிதி; தமிழரின் தாள் பிடித்துக் கிடந்த நிலை போய், தமிழரிடம் தாள் படித்துத் தமிழரைத் தாழ்வுறச் செய்யும் வர்க்கத்தின் தூதுவர், திராவிடத்திலே திராவிட மறவர் திண்டோள் தேய்ந்து விடாமல் இருக்கிற நேரத்திலே திண்டிவனம் பகுதியிலே திருக்குறள் முனுசாமியை எதிர்த்துப் போட்டி முழக்கம் செய்து வருகிறார்!

சிங்கத்தின் குகையிலே சிறு நரிகள் செங்கோல் செலுத்திடக் காணுகிறோம் அந்தக் கோழைத் தனம் மறைவதற்கான முயற்சியிலே தீரத் திராவிடர் பலர் பணிபுரிந்திடும் காலத்திலே கோயங்கா பிரவேசித்திருக்கிறார்.

தினமணி மூலம் திராவிடத்தைத் தேய்த்திடும் திராவிடத்தின் நிரந்தரப் பகைவர்களின் தளபதிகளிலே ஒருவர் திண்டிவனத்திலே வெற்றி முரசம் கொட்ட, வீர விருத்தம் பாடமுனைகிறார் என்றால் இதைவிடப் பெரியதொரு சோதனைக்காலம் வீரர்களுக்கு வரவேண்டிய தில்லை?

திராவிடரை இழித்துப் பேசிய வட நாட்டார் கனக விசயர்கள் தலையிலே கல்லேற்றி இழுத்து வந்தான் பழைய நாள் தீரன்! அந்த கனக விசயர் பரம்பரை, திராவிடத்தை நோக்கி வருகிறது, சேரன் பரம்பரையைத் தோற்கடிக்க.

சொந்தப் பத்திரிகை பலம்! சுற்றிச் சுற்றி வேலை செய்யும் பத்திரிகை உத்தியோகஸ்தர்களின் பிரச்சாரம்! அந்தப் பிரச்சாரர்களைச் சந்தேகித்து அவர் பின்னே மறைந்து மறைந்து வேவு பார்த்து வேலை செய்யும் மார்வாரிகள்! இப்படி நடக்கிறது தேர்தல் போர் திண்டிவனத்திலே!

திண்டிவனம் தொகுதியிலே இருப்பவர்கள், ஏமாளிகள் அல்ல! "எலிகள் புசிக்க எல்லாம் கொடுத்தே சிங்க ஏறுகள் தூங்கிடுமோ?" என்ற புரட்சிக் கீதத்தை மறந்து விட்டவர்கள் அல்ல!

கோயங்காவுக்கு போடுகின்ற ஒவ்வொரு ஓட்டும், திராவிடர் வாழ்வுக்குத் தரப்படுகிற அதிர்வேட்டு என்பதைத் திண்டிவனம் தொகுதி மறந்துவிடக் கூடாது!

ஆலை அரசர்கள் வடநாட்டிலே! அரசியல் தலைமை வடநாட்டிலே, ஆட்சிக்கோல் வடநாட்டிலே! இவ்வளவு பிடியையும் வைத்துக்கொண் டிருக்கிற வடநாடு, செக்கிழுத்த தேசீய சிதம்பரத்திற்கு மதிப்புத் தராத வடநாடு, திருப்பூர் குமரனை நினைத்தும் பார்க்காத வடநாடு, தில்லையாடி வள்ளியம்மாளுக்கு புகழ் பாடாத வடநாடு, தென்னாட்டைச் சுரண்டிடும் வடநாடு, திராவிடத்தை மிதித்து வாழும் வடநாடு, திராவிடத்திலேயே அபேட்சகரையும் நிறுத்தி வைத்து, திராவிடத்தின் ஏமாளித்தனத்தை எடை போட்டுப் பார்க்கத் தீர்மானித்துவிட்டது!

திருக்குறள் முனிசாமி, தி. மு. கழகத்தின் ஆதரவு பெற்றவர். திராவிடத் தனியரசுப் பிரச்சினையிலே அக்கரை கொண்டவர்! அவருடைய வெற்றி திராவிட நாட்டுப் பிரச்சினையின் வெற்றி! தி. மு. கழக மதுரை தீர்மானத்தின் வெற்றி!

கோயாங்கா வீழ்ந்தால் திண்டிவனம் தொகுதி திராவிடம் உள்ளளவும் 'தீரர்கள் சோலை' என்ற திருப்பெயரைப் பெறும்! கோயாங்கா வெற்றி பெற்றால் திண்டிவனத்திலே, விபீஷணர்கள் திரிகிறார்கள் என்ற அவச் சொல்லுக்கு ஆளாகும்!

திண்டிவனம் தொகுதி வாக்காளர்களே! உங்கள் ஆதரவு, திராவிடப் பிரச்னையை ஆதரிக்கும் திருக்குறள் முனிசாமிக்கா? வடநாட்டு ஏகாதிபத்தியப் பெருச்சாளி கோயாங்காவுக்கா? திண்டிவனம் தொகுதி வாக்காளர்களே! உங்கள் ஆதரவு சேரன் செங்குட்டுவன் பரம்பரைக்கா? களங்கமூட்டவரும் கனக விசயன் வம்சத்திற்கா?

சுயமரியாதை இரத்தம் சுழன்றோடிடும் சுத்தத் திராவிடரே! சொல்லுங்கள் பதில்! சூழ்ச்சிக்கார வடநாட்டைச் சோர்வுறச் செய்யுங்கள்! வாழ்க திராவிட மானம்!

திராவிட முன்னேற்றக் கழகம் மதுரையில் கூடிய பொதுக் குழுவில் தீர்மானித்தபடி தி. மு. க. உறுதி மொழி ஒப்பந்த ஏட்டில் கையெழுத்திட்டவர்கள் சுமார் நூற்றைம்பதுபேர் அந்தந்த மாவட்டங்களின் குழுக்கள் கூடி அவர்களிலே ஏறக்குறைய எழுபது பேரைத் தேர்தலில் ஆதரிப்பது என்று முடிவு கூறப்பட்டது.

அந்த எழுபது பேரிலே தென்னாற்காடு மாவட்டத்திலே இருபத்தி மூன்று அபேட்சகர்கள் நம் ஆதரவு பெற்றிருக்கிறார்கள்.

தென்னாற்காடு மாவட்டத்திலே இருபத்திமூன்று ஸ்தானங்கள். அந்த இருபத்திமூன்று இடங்களிலும் நம் கழகத்தின் ஆதரவு பெற்றவர்கள் போட்டியிடுகிறார்கள்.

திராவிட நாட்டுக் குரலை எழுப்புகிற தீரர்கள்! நாட்டுப் பிரிவினையை எதிர்க்கும் நல்ல பாம்புகளைச் சந்திக்கும் கீரிகள்!

பிரிவினை கூடாது எனப் பெரு முழக்கம் செய்திடும் இருட்டுக் குகையில் ஒளிந்திருக்கும் சுயநலப் பேயர்களை நாட்டுக்கு அம்பலப்படுத்தும் அறிவு விளக்குகள்!

தென்னாற்காடு மாவட்டத்திலே உழைப்பாளிகள் கட்சி காங்கிரசின் சமாதிக்கு அஸ்திவாரம் அமைக்கிற கட்சி. பொதுநலத் தொண்டரும், உழைப்பாளிகளின் உற்ற தோழரும், உழைப்பாளி கட்சியின் தளபதியுமான தோழர் S. S. இராமசாமி அவர்களும் அவருடன் தோளோடு தோள் இணைந்து தொண்டு புரியும் தோழர்களும் கொடுமைகளைத் தொலைத்திடும் திருப்பணியிலே ஈடுபட்டிருக்கிறார்கள். தென்னாற்காடு மாவட்டத்திலே இந்தத் தீரர்கள் உலவாத இடமில்லை! தேர்தல் நேரத்திலே மட்டுமல்ல, தென்னாற்காட்டைத் தங்கள் வீடென்று எண்ணி தென்னாற்காட்டு மக்களைத் தங்கள் குடும்பத்தினர் என்ற எண்ணத்தை ஏந்தி வாழ்ந்திடும் வைரமணிகள் தான் உழைப்பாளிக் கட்சிக்கான நண்பர்கள்.

இத்தகைய இலட்சிய வீரர்கள் நடைபோடும் தென்னாற்காட்டிலே, மூவேந்தரின் மரபினர் காவல் புரியும் அந்த முத்தமிழ்ச் சோலையிலே மாடுகள் நுழையத் துணிகின்றன. மிக மிகக் கொடுமையான செய்தி, வடநாட்டுக் கோயாங்கா வள்ளுவர் பரம்பரையை எதிர்க்க வந்திருப்பதுதான்!

திராவிடத்தின் அழியாத செல்வம் திருக்குறள்; அந்தக் குறளை ஏந்தி நிற்பவர் திராவிடப் பிரிவினையை ஆதரிக்கும் திருக்குறள் முனிசாமி!

கோயாங்காவின் செல்வம், திராவிடத்திலே சுரண்டப்பட்ட செல்வம்!

இந்த—இரண்டு செல்வங்களும் மோதுகின்றன!