உள்ளடக்கத்திற்கு செல்லவும்
கலைஞர்கலைஞர்
திரைக்கதை & வசனம்

திரும்பிப்பார்!

காட்சி 84 · 84 / 93

பூமாலை: தவிப்பவர்கள் குறையைச் சொல்ல தலைவியாகத்தான் வரவேண்டுமோ? அய்யா அப்படியொன்றும் நான் வரவில்லை. ஏழைத் தொழிலாளிகளின் ஏக்கத்தைப் போக்குகிறேன் என்று சொல்லுங்கள் - போதும்.

முதலாளி : இந்தப் புத்தியை முன்னமேயே உன் தம்பிகிட்ட சொல்லியிருக்கணும் நீ.

பூமாலை : தம்பி செய்த பாபத்திற்குத்தான் அக்காள் பிராயச்சித்தம் செய்ய வந்திருக்கிறாள். தயவுசெய்யுங்கள் அய்யா.

முதலாளி : முடியாது... போ.... போய்விடு.

பூமாலை: (காலில் விழுந்து) அய்யா! உங்கள் காலைப்பிடித்துக் கொள்கிறேன், கதியற்றவரின் கண்ணீரைத் துடையுங்கள். பசி, பட்டினி, பஞ்சத்தில் பாட்டாளிகளைத் தள்ளாதீர்கள். என்ன இருந்தாலும் அவர்கள் உங்களிடம் வேலை செய்தவர்கள். உங்களுக்கு குழந்தைகள் மாதிரி ஐயா !...

முதலாளி : விடு காலை.

பூமாலை: விட முடியாது. வேதனைக்குரலுக்கு நீங்கள் செவி சாய்க்கும் வரையில், வாழ முடியாதவர்களுக்கு நீங்கள் வகைசெய்யும் வரையில் விட முடியாது.

முதலாளி : சீ மூதேவி.

(காலை உதறி போதல்- பூமாலை காயமடைதல்- அப்போது வந்த உஷா)

உஷா : அடெடெ! பூமாலையா.... பலமாக அடிபட்டுவிட்டதே. டேய்...யார் அங்கே?

★

வார்டர் : உனக்கு விடுதலைப்பா.

பாண்டியன் : அதற்குள்ளாகவா- மூன்று வருஷம் ஆகவில்லையே...

வார்டர் : உனக்கு மட்டுமல்ல. இன்றைக்கு இந்த உபகண்டத்திற்கே விடுதலை - சுதந்திரதின விழா - அதனால்தான் நீ விடுதலை செய்யப்பட்றே.

முதல் பதிப்பு: 1953