உள்ளடக்கத்திற்கு செல்லவும்
கலைஞர்கலைஞர்
திரைக்கதை & வசனம்

திரும்பிப்பார்!

காட்சி 31 · 31 / 93

(பாண்டியன் என்றதும் அவள் முகம் மாறுகிறது- உதடுகள் முணுமுணுக்கின்றன. பிறகு மாணவ - மாணவிகளிடம்)

பூமாலை: சரி வீட்டுக்கு போய்ட்டு நாளைக்கு வாங்க

(எல்லோரையும் அனுப்புகிறாள். அவர்கள் போனதும், தோட்டத்துப் பக்கம் போகிறாள்)

★

(தோட்டம்- மாலை

[இயற்கையை ரசித்துக் கொண்டிருக்கும் பாண்டியனிடம் பூமாலை நெருங்கி]

பூமாலை : சிந்தனைக்கு இடையூறு ஒன்றும் இல்லையே...

பாண்டியன் : இல்லை, இல்லை....

பூமாலை: எதிலே பறிகொடுத்திருக்கிறீர்கள் மனதை ! வானத்தின் அழகிலா - மேகத்தின் அசைவிலா?

பாண்டியன் : மோனத்திருக்கும் முதிர் சோலையில், கானத்தால் களிப்பூட்டும்

பூமாலை : வானம்பாடியின் வரவை எதிர்ப்பார்த்து ஏக்கமா? பாண்டியன்! சிரிக்கும் முல்லையும், சிங்காரக் கொல்லையும் உங்கள் சிந்தைக்கு விருந்தளிக்கப் போதவில்லை என்பதை உணர்ந்துதான் வானம்பாடி பறந்து வந்திருக்கிறது !

பாண்டியன்: எங்கே?

பூமாலை: தெரியவில்லை.விழியாலும் காணலாம். ஆனால் முதலில் நெஞ்சத்தால்தான் காண முயலவேண்டும்.

பாண்டியன்: (சந்தேகத்தோடு) பூமாலை .......

(சொல்லிக் கொண்டிருக்கும்போது அக்கா என்ற குரல் கேட்டு திடுக்கிட்டுத் திரும்புகிறாள். பரந்தாமன் வருகிறான்)

முதல் பதிப்பு: 1953