உள்ளடக்கத்திற்கு செல்லவும்
கலைஞர்கலைஞர்
திரைக்கதை & வசனம்

திரும்பிப்பார்!

காட்சி 18 · 18 / 93

பாமா : எத்தனை நாளைக்கு ஹோட்டலில் தங்கியிருப்பது. சீக்கிரம் ஒரு வீடு பாருங்கள்.

பரந்தாமன் : வீடு பார்ப்பது இருக்கட்டும்.. வா இன்றைக்காவது ஊரைச் சுற்றிப் பார்த்துவிட்டு வரலாம்.

பாமா: ஊஹும்... முதலில் குடும்பம் ஆரம்பிக்க வேண்டும்.

பரந்தாமன் : ஆரம்பிப்போமே. ஏன் அவசரப்படுகிறாய். குடும்பத்துக்கும் சென்னையைச் சுற்றிப் பார்ப்பதற்கும் என்ன சம்பந்தம்?

பாமா: சென்னையில் என்ன இருக்கிறது?

பரந்தாமன் : சென்னையில் என்ன இருக்கிறதா? கண்காட்சி சாலையைப்பற்றி கதை கதையாகச் சொல்கிறார்கள். கதிரவனைப் பழிக்குமாம் கலங்கரை விளக்கம். மிருகக் காட்சி சாலையும், மெரினா கடற்கரையும் பார்க்காத கண்கள் பாபக் கண்களாம். ம்...புறப்படு ! அன்புக்கரசி, அழகு மணி மாளிகையின் அலங்காரத் திருவுருவே. அழித்தெழுதா சித்திரமே. புறப்படு.

(புறப்படுதல்)

★

[கூண்டில் புலி]

பரந்தாமன்: (பாமாவிடம்) புலி வாயில் உன்னைத் தள்ளிவிட்டால் என்ன செய்வாய்?

பாமா: புல்லாக மாறிவிடுவேன்....புலி பசித்தாலும் புல்லைத் தின்னாது !

பாமா: நீலக்கடல் நேர்த்தியான காட்சி !

பரந்தாமன் : இந்தக் கடல் திடீரென்று பொங்கிவிட்டால்..

பாமா: அழகுக்குப் பக்கத்தில் எப்போதும் ஆபத்து இருக்கும்.

முதல் பதிப்பு: 1953