உள்ளடக்கத்திற்கு செல்லவும்
கலைஞர்கலைஞர்
காகிதப்பூ/காட்சி 9
நாடகங்கள்

காகிதப்பூ

காட்சி 9 · 9 / 23

(கண்ணன் ஏழை நெசவாளியை நினைக்கிறான்)

முருகன் ஒலி:— “ஏழை நெசவாளி அய்யா உங்க கட்சி ஆட்சியிலே பெண்ஜாதி புடவையை வித்துப் பொங்கல் கொண்டாடுகிற அளவுக்கு ஆயிட்டுது!” பெண்ஜாதி புடவையை விந்து பொங்கல் கொண்டாடுகிற அளவுக்கு ஆயிட்டது... பெண்ஜாதி புடவையை வித்துப் பொங்கல் கொண்டாடுற அளவுக்கு ஆயிட்டுது...

(கண்ணன் ஒரு முடிவுக்கு வருகிறான்)

தசாவ:— கண்ணா!... முதலாளி வீட்டுக்கு போகலாமா?...

கண்:— தசாவதாரம்... காலையில் வருகிறேன்...

தசா:— நிச்சயமா வர்ரியா?...

கண்:— வருகிறேன்.

(போகிறான் வேகமாக)

தசா:— (தனக்குள்) அதான்; பணத்தை வாங்கிட்டான்... இனிமே மாற மாட்டான்...

(போகிறான்)

(திரை)

நெசவாளி வீடு

(முருகன், பானை—கரும்பு முதலியவைகளுடன் வருகிறான்... “மீனா! மீனா!!” என்று மகிழ்வுடன் அழைத்தவாறு)

முரு:— மீனா... மீனா! புடவையை விற்காமலே... பத்து ரூபாய் கிடைத்துவிட்டது... பத்து ரூபாய்... இதோ... புதுப்பானை... கரும்பு... மஞ்சள்... இஞ்சி... மீனா! மீனா!!...

(தேடிவிட்டு அண்ணாந்து பார்க்கிறான்)

(மீனா, தூக்கு மாட்டிக் கொண்டு தொங்குகிறாள்...)

முரு:— ஆ! மீனா! அய்யோ... ஏன் மீனா செத்து விட்டாய்? இந்தப் பாவி உன் புடவையை விற்கவும் துணிந்து விட்டேனே என்று ஆத்திரப்பட்டா... மானத்தை மதிக்கும் மாதரசே! நீ மரணத்தின் வாயில் விழுந்து விட்டாய்? நீ தானே சொன்னாய் மீனா பொங்கல் கொண்டாட வேண்டுமென்று! இப்போது தீராத சோகப்பொங்கல் பொங்கி விட்டாயே... மீனா! மீனா...

(தலையில் அடித்துக் கொள்கிறான்...)

(கண்ணன் ஓடிவருதல்...)

கண்:— அய்யா... இந்தப் பணத்தை வைத்துக் கொள்ளுங்கள்... 250 ரூபாய் இருக்கிறது...

முரு:— 250 ரூபாய்! 250 ரூபாய்!!... அதோ பாரய்யா... நானும் என் மனைவியும் நாங்கள் பெற்ற பிள்ளையும்... பசியால் துடித்த போது கிடைக்காத பணம்... அய்யோ; என் ஆருயிர் மீனா... பிணமாகப்போனபிறகு... அவள் இறுதிச் சடங்கிற்காகக் கிடைத்திருக்கிறது... இறுதிச்சடங்கிற்காகக் கிடைத்திருக்கிறது... மீனா! பணம்! பணம்!... 250 ரூபாய்!... ஹ... ஹ... ஹ... ஹ... பணம்... மீனா! மீனா!...

(பைத்தியமாகிறான்)

கண்:— அய்யா! அய்யா!!...

முருக:— வந்தே மாதரம்! ஜே ஹிந்த்!... நடப்பது நம்ம சர்க்கார்... நம்ம சர்க்கார்... கட்டிக்கத் துணியில்லை... கால் வயத்து கஞ்சியில்லை... நடப்பது நம்ம சர்க்கார்... நம்ம சர்க்கார்... ஹ ஹ ஹ......

(கரன்சி நோட்டுக்களை இறைக்கிறான்...)

(திரை விழுகிறது)

திரவியம்பிள்ளை வீடு

(காளி படத்திற்கு நேராக நின்று இரவு நேரத்தில் பூஜை செய்கிறார்... மலர்களை அள்ளிப் போட்டு விட்டு...)

திரவியம்:— பரமேஸ்வரி! பார்வதி! லோக்காளி! பராசக்தீ!... மகாகாளி! மகாகாளி!! அம்பிகே!... அருள்புரிவாய்... 1967 தேர்தலில் நான் வெற்றி பெற்று ஒரு மந்திரியாக வேண்டும்—மந்திரியாக வேண்டும்... எதிர்க் கட்சிக் காரர்களுக்கு சட்ட சபையிலே ஒரு இடம் கூட வரக் கூடாது... எல்லா இடமும் எங்க கட்சிக்கே வர வேண்டும்... மகேஸ்வரி!... என்ன மந்திரியா ஆக்கும்மா! மந்திரியா ஆக்கு!...

(படத்திற்குப் பின் புறமிருந்து)

காளிகுரல்:— பக்தா!