உள்ளடக்கத்திற்கு செல்லவும்
கலைஞர்கலைஞர்
பராசக்தி/காட்சி 14
திரைக்கதை & வசனம்

பராசக்தி

காட்சி 14 · 14 / 46

மைனர் : இவள் நடையே தனி அழகு சார்! இந்த மாதிரி உருவப்படி நமக்குப் கிடைக்கணுமே!

வந்த : எல்லாம் பணம் போட்டால் கிடைக்கும் சார்...

(குணசேகரன் மைனர்களை அடித்து)

குண : சிகரெட்...(மைனர்கள் கொடுத்துவிடுகின்றனர்) ஹா...ஹா...லக்ஸ் (இன்று முதல் நானும் ஒரு ஏமாத்துக் காரன்.)

(பைத்தியக்காரன் மூலம் ஏமாத்துக்காரனே பிழைக்க முடியும் என்றபட்டம் பயின்ற குணசேகரன் தானும் ஓர் பைத்தியம் போல் நடித்து ஆடிப்பாடி பலரிடம் பணம் பறிக்கிறான்.)

தேசம், ஞானம், கல்வி, ஈசன் பூசையெல்லாம் காசுமுன் செல்லாதடி குதம்பாய் காசுமுன் செல்லாதடி

ஈசனும் ஈசனார் பூசையும் தேசத்தில் காசுக்குப் பின்னாலே—குதம்பாய் காசுக்குப் பின்னாலே காட்சியான பணம் கைவிட்டுப் போனபின் சாட்சி கோர்ட்டு ஏறாதடி

பை பையாய் பொன் கொண்டோர் பொய் பொய்யாய் சொன்னாலும் மெய் மெய்யாய் போகுமடி—குதம்பாய் மெய் மெய்யாய் போகுமடி

நல்லவரானாலும் இல்லா தவனை நாடு மதிக்காது—குதம்பாய் நாடு மதிக்காது கல்வி இல்லாத மூடரைக் கற்றோர் கொண்டாடுதல் வெள்ளிப் பணமடியே—குதம்பாய் வெள்ளிப் பணமடியே

ஆரியக் கூத்தாடினாலும் தாண்டவக் கோனே—காசுக் காரியத்தில் கண்வையடா தாண்டவக்கோனே

உள்ளே பகைவையடா தாண்டவக்கோனே—காசுக்கு உதட்டில் உறவாடடா தாண்டவக்கோனே

முட்டாபயலையெல்லாம் தாண்டவக்கோனே—காசு முதலாளியாக்குதடா தாண்டவக்கோனே—காசு கட்டி அழும்போது தாண்டவக்கோனே—பிணத்தைக். கட்டி அழும்போது தாண்டவக்கோனே—பணப் பெட்டிமேலே கண்வையடா தாண்டவக்கோனே

(குணசேகரன் பைத்தியக்காரன்போல் நடித்து சென்னையிலிருந்து மதுரையில் தன் வீட்டுக்கு அருகே வந்து சேருகிறான். அவ்வீடு பூட்டி இருப்பதால் பக்கத்தில் பிச்சை போட்டுக்கொண்டு நின்ற பார்வதியை விசாரிக்கிறான்)

பார் : அட! நீ யாரையா இரு வர்றேன்

குண : இல்லேம்மா, நான் பிச்சைக்காரனில்லை பக்கத்து வீட்டிலே மாணிக்கம் பிள்ளைன்னு ஒருத்தர் இருந்தாரே, இப்ப அவரு எங்கம்மா இருக்காரு!

பார் : யாரு! கல்யாணி அவுங்க அப்பாதானே?

குண : ஆமாம்மா!